Sinto unha conmoción na Forza...

Fai moito, moito tempo, nunha galaxia moi lonxana,
un barbudo "padawan" escribía de cando en vez nun vello blogue,
compartindo letras, fotos e ideas con algúns dos mellores da República.

Pero canda o verán, chegou o emperador PalpaTVGine,
e mantívoo afastado da Forza durante uns meses.
Despois chegaron as escuras forzas da Federación do Casorcio,
que lle encomendaron a misión coñecida como "evento 27-S".

Aínda non recuperado da viaxe pola galaxia Granadine,
e o paso polos asteroides Cordoboo e Alpujarris
o noso xoven "padawan" atópase xa atrapado
na preparación dunha nova e apaixoante misión
que hai uns meses recibía do Senado Intergalaico...

A futura chegada de Bruno Penabade, o herdeiro

Pois ben... moi boas a todos...

como saberedes algún, e seguramente non polo ben informados que eu vos teño, levo uns meses, semanas un pouquiño liado con ocupacións diversas... entre elas algunhas das que me gustaría ter xestionado doutro xeito e tervos informado mais polo miudo, pero o certo é que ás veces un non é quen de facer as cousas como lle gustaría...

En resume, para os que non vos esteades enterando de moito: o pasado 27-S, María e mais eu casamos (a pesar das autoridades civís e eclesiásticas que nos escarallaron un pouquiño a nosa idea inicial de "casorio"). O evento foi un pouquiño aburrido, e póñovos aquí abaixo varias imaxes nas que se pode confirmar o "mal" que o pasamos...




A outra noticia xa non sei a quen de vós vola contara e a quen non... pero o conto é que, despois de seguir os pasos do Mestre Qui-Lorenzo-Jin no paso ao lado escuro do matrimonio, nuns meses chegará á nosa galaxia o herdeiro desta miña estirpe (é dicir... que a María e mais eu estamos a esperar un neno). Disque lle imos chamar Bruno ao indivíduo, e agardo (desta volta) tervos máis informados das futuras novidades

E ben... vouvos deixar xa que levo 24 horas cunha "cagalera" de cabalo e xa me teño máis que estudado as preciosas proporcións elípticas do meu branco sanitario "Roca"... en resume, que estou feito "unha merda"

P.D: O certo é que non sei moi ben que causou esta diarrea, tan só teño a sospeita dun churrasco que comín onte, e que en plena costela levaba un sospeitoso selo azulado co nome dunha carnicería que non coñecía: "Carnes e Chacinas Monteira Furada"