As vantagens do Padrom AGAL vs Padrom Lusitano

Escolma de argumentos estratégicos a favor do padróm galego temporário dentro do reintegracionismo. O resto do artigo no link, para quem goste e precise detalhes.

O grande valor estratégico da normativa da CL-AGAL advém das seguintes quatro propriedades, que tornam na Galiza atual a codificaçom ortográfica e morfológica agaliana mais eficaz para a causa do reintegracionismo do que o padrom lusitano: 1.ª- Melhor correspondência com os falares galegos; 2.ª- Orientaçom pedagógica; 3.ª- Constituiçom de um elo de ligaçom entre o galego-castelhano e o luso-brasileiro; 4.ª- Autoctonia da fonte de codificaçom. Vejamos a seguir como se plasmam na Galiza atual estas propriedades e os beneficiosos efeitos que elas produzem para a causa da língua e do reintegracionismo.

A melhor correspondência com os atuais falares galegos do padrom da CL-AGAL em comparaçom com o padrom lusitano deriva da circunstáncia de aquele, mas nom este, ter sido especificamente concebido para espelhar o que poderia ser chamado de “galego comum contemporáneo”, incluindo-se aqui peculiaridades substantivas (e legítimas!) dos falares galegos que conformam umha norma galega em processo de cristalizaçom. Assim, por exemplo, no relativo à nasalaçom, o “galego comum” vê-se mais bem refletido nas grafias agalianas umha e home do que nas respetivas lusitanas uma, homem; nos morfemas (ou, se se preferir, forçando algo, grafemas!) terminais agalianos afám – capitám – camiom – verao, mais bem do que nos respetivos lusitanos afã – capitão – camião – verão; no uso promoninal dou-cho mais bem do que no galego minoritário dou-to; na forma fôrom, oposta na Galiza a foram, mais bem do que na equivalente lusitana foram; enfim, nas formas verbais agalianas ele fai, ela fijo, eu pugem e eu partim, mais bem do que nas respetivas lusitanas ele faz, ela fez, eu pus e eu parti.

http://www.pglingua.org/index.php?option=com_content&view=article&id=2468:atualizacom-da-normativa-ortografica-da-agal-incremento-da-coesom-conservacom-do-valor-estrategico-e-ii&catid=20:info-agal&Itemid=59