Incidentes em Santiago no Apostolo

Piden sancións para un policía que ameazou unha moza por falar galego
O BNG demanda medidas disciplinarias contra este axente e denuncia intimidacións por portar bandeiras galegas

A actuación de varios policías antidisturbios durante a pasada fin de semana en Compostela desatou a polémica. Segundo denuncia El País, un axente advertiulle a unha xornalista andaluza do mesmo medio que podía levar “unhas hostias” despois de agarrala polo brazo e de lembrarlle que en Santiago “no hay nada que se llame Pescadería Vella”. “Se llama Pescadería Vieja y tú, que eres de fuera, deberías saberlo”, díxolle o policía a unha periodista que preguntou a un viandante como chegar a esta praza, para o que utilizou o seu nome oficial, en galego.

Pouco despois, o axente, que vixiaba na Alameda unha concentración de mozos independentistas, convidou a agredida a marchar antes de cargar contra os manifestantes. “Corre, no vaya a ser que te demos unas hostias”, advertiulle, segundo asegura o propio medio. Pouco despois, varios mozos provocaron desperfectos no mobiliario urbano e nun coche da Radio Galega.

Non foi a única denuncia. Outro medio, o dixital Galiciae, asegura que outra xornalista –que ía acompañada doutras catro rapazas– foi intimidada por un axente que preguntou ao grupo se tiña algún problema por que el non falase galego. “A ver si camináis tan lento cuando vaya detrás de vosotras; tú, con lo gorda que estás, seguro que debes de andar cerca de los noventa kilos”, disque lle dixo o axente ás mulleres entre risas.

Non quedou todo aí. Segundo asegura o BNG, A Mesa e varias persoas anónimas, foron varios os policías nacionais que impediron o acceso de moita xente a distintos puntos da cidade compostelá por portar bandeiras galegas.

Por todo isto, o portavoz do Bloque no Congreso, Francisco Jorquera, rexistrou unha iniciativa parlamentaria na que demanda ao Goberno que adopte medidas disciplinarias contra o a axente que intimidou a xornalista “por ser respetuosa e utilizar a denominación oficial da Praza da Pescadería Vella”. “Sobran palabras para describir a violencia, o odio e a agresividade do axente policial”, asegura o deputado nacionalista, que pide a apertura inmediata dunha investigación e que se adopten as medidas pertinentes.

O mesmo solicita A Mesa pola Normalización Lingüística, que pide a Interior “unha investigación seria, transparente e profunda sobre os repetidos casos de criminalización da lingua galega e dos símbolos galegos por parte da policía”. Carlos Callón, presidente da entidade, cre que actuacións como as denunciadas son unha “tentativa deplorábel e antidemocrática de criminalizar o idioma propio”.

Tanto a entidade a prol da lingua galega como o BNG denunciaron tamén que a Policía Nacional “impediu a moitas persoas o acceso a distintos puntos da cidade por portar bandeiras galegas no Día da Patria”. “Incluso houbo axentes que puxeron impedimentos para acceder con bandeiras á manifestación do Bloque na Praza da Quintana”, asegurou Jorquera, que pregunta ao Goberno central se vai investigar os feitos e se vai tomar medidas contra o antidisturbio que ameazou a xornalista andaluza.